Азәрбајҹан дилинин диалектоложи атласы

Азәрбајҹан дилинин диалектоложи атласы 128 хәритәдән ибарәт олуб, үмумијјәтлә Азәрбајҹан ССР әразисиндәки диалект вә шивәләри әһатә едир. Һәр хәритә үчүн ајрыҹа шәрһ јазылмышдыр. Атласын хәритәләриндә Азәрбајҹан диалектләриндә мүшаһидә олунан спесифик фонетик, грамматик, лексик хүсусијјәтләр хүсуси ишарәләрлә әкс етдирилмишдир. Диалектоложи атлас ајры-ајры дил хүсусијјәтләринин Азәрбајҹан ССР әразисиндә неҹә вә нә шәкилдә јајылмасы, онларын сәрһәди һаггында тәсәввүр верир.